Sentyabrda metronun yeni "Nəsimi" stansiyasının açılışı olacaq

Stansiyanın açılışı ilə bərabər, keçmiş "Bakı soveti", yeni adı isə "İçərişəhər" olan stansiyanın da təmirdən sonra açılışı təşkil ediləcək

Sentyabr ayının 15-də metronun 6-cı və 9-cu mikrorayonlar ərazisində yerləşən "Nəsimi" stansiyasının açılışı olacaq.

Artıq stansiyanın 4 çıxışından 2-si hazırdır, platformada bəzək və memarlıq işləri gedir. Stansiyanı təmiz hava ilə təmin etmək üçün 2 ventilyasiya quraşdırılıb. Qatarların hərəkəti üçün yol relslərinin quraşdırılma prosesi başa çatmaq üzrədir. 2 saylı tunel-tikinti idarəsinin baş mühəndisi Məmməd Həsənovun sözlərinə görə, hazırda stansiyasında tikinti-quraşdırma işləri başa çatıb, üzləmə işləri tamamlanmaq üzrədir, eskalator quraşdırılıb və sınaq işləri aparılır.

"Nəsimi" stansiyası ilə "Azadlıq prospekti" stansiyası arasında isə tunel qazıntısı davam etdirilir. Üzləmə işləri başa çatdıqdan sonra ərazidə yerüstü abadlıq işlərinə başlanılacaq. 1 il 4 aydır ki, stansiyanın tikintisi gedir. Bilik günü stansiyanın açılışı gözlənilir.

Sentyabr ayının 15-də "Nəsimi" stansiyasının açılışı ilə bərabər keçmiş "Bakı soveti", yeni adı isə "İçərişəhə"r adlanan stansiyanın, həmçinin "28 may" stansiyasının Mirəli Qaşqay və Salatın Əsgərova küçələrinin kəsişməsində yeni çıxışının açılışı olacaq. "28 may" stansiyasının yeni çıxışının tikintisi başa çatıb, ərazidə üzləmə işləri gedir.

7-ci və 8-ci mikrorayonlar ərazisindəki «Azadlıq prospekti» stansiyasında tikinti-quraşdırma işləri davam etdirilir. Stansiyanın 2009-cu ilin sonuna kimi təhvil verilməsi gözlənilir. 3 saylı tunel-tikinti idarəsinin rəisi Biləndər Məsiyevin sözlərinə görə, indiyədək Bakıda belə stansiya olmayıb: «Dayaqlar olmayacaq və 1 tağlı olacaq»

2025-ci ildə Bakıda çoxşaxəli metro sistemi ola bilər. Belə ki, Bakı metropoliteni xətlərinin yeni inkişaf planı hazırlanıb. Xətlərin inkişaf sxemi Bakı metropoliteninin və «Azərmetrotuneltikinti» idarəsinin mütəxəssisləri tərəfindən işlənib hazırlanıb. Bakı metropolitenin rəis müavini, tikilən metropolitenin müdiriyyətinin rəisi Arif Rəsulovun sözlərinə görə, yeni layihəyə əsasən stansiyaların sayı 20-dən 60-a çatdırılacaq. Layihədə sərnişinlərin şəhərin giriş qapılarından - Şıx, Xırdalan, Qurd qapısından götürülməsi, inşa olunacaq yeni stansiyaların şəhərin əsas küçə və prospektlərinin altı ilə keçməsi, xətlərin müstəqil hərəkət etməsi və sair nəzərdə tutulub. Layihə martın 29-da 5 dövlət təşkilatına göndəriləcək.

Daha sonra təsdiqlənməsi üçün Nazirlər Kabinetində müzakirələr aparılacaq. Yeni sxemə əsasən, layihənin reallaşması ən geci 2025-ci ilədək hazır ola bilər. Plana əsasən, Xətai-Zığ şossesi istiqamətində Nobel prospektində 5 stansiyanın tikilməsi nəzərdə tutulub. Həmçinin şəhərin giriş qapılarında Xırdalan, avtovağzal, Binəqədi və Sabunçu dairəsində sərnişinlərin digər xətlərə keçməsi və yeni xətlərin tikilməsi nəzərdə tutulub.

Bundan başqa Babək prospekti, Şıx və Binəqədi qəsəbələrində yeni depolar tikiləcək. Bu isə o deməkdir ki, 4 xəttin ayrılıqda 4 deposu fəaliyyət göstərəcək ki, bununla da qatarlar arası intervalı maksimum dərəcədə aşağı salmaq mümkün olacaq. Bakı metropoliteninin rəis müavininin sözlərinə görə, gələcəkdə layihənin həyata keçirilməsi ilə qatarlar arası intervalı 2 dəqiqə, hətta 60 saniyəyə endirmək olar.

Qeyd edək ki, bir kilometrlik dərin özüllü xəttin çəkilməsi üçün 60-65 milyon avro vəsait tələb olunur. Dayaz özüllü tunelin tikintisi üçün isə 20 milyon avro lazımdır. Bu pula metrostansiyanın tam tikintisi də daxildir. Yenilik bir də ondan ibarətdir ki, sxemə əsasən, ayrı-ayrı stansiya keçidləri tikiləcək. /ANS PRESS/