Yeniyetmələr internetdən hansı məqsədlərlə istifadə edirlər?

Sorğu nəticəsində əksər yeniyetmənin əxlaqsız və porno saytlara maraq göstərdiyi üzə çıxıb

“Gənc Liderlər” Uşaq Təşkilatının keçirdiyi sorğu nəticəsində əksər yeniyetmənin İnternetdə əxlaqsız və porno saytlara maraq göstərdiyi üzə çıxıb. Bu barədə ANS PRESS-ə təşkilatının sədri Fərid Şahbazlı verib. Təşkilat sədri bildirib ki, yeniyetmələrin internetdən hansı məqsədlərlə istifadə etdiyini öyrənmək məqsədi ilə məktəb yaşlı uşaqlar arasında sorğu keçirilib. Onun sözlərinə görə, 220 respondentin iştirak etdiyi sorğuya Bakının müxtəlif məktəblərinin şagirdləri cəlb olunub. Sorğu iştirakçılarının 169 nəfəri “İnternetdən nə məqsədlə istifadə edirsiniz?” sualına açıq şəkildə porno saytlarla məşğul olduğunu bildirib. 36 nəfər İnternetdən müxtəlif kompüter oyunları oynamaq, yalnız 5 nəfər səmərəli məqsədlər üçün istifadə etdiyini, qalan 10 nəfər isə ümumiyyətlə kompüter biliklərinin olmadığını qeyd edib. F. Şahbazlı qeyd edib ki, sorğu iştirakçıları İnternet klublarında porno saytlardan istifadə etməsinə heç bir maneə olmadığını deyiblər. Təşkilat əlaqədar dövlət qurumlarını İnternetdə porno saytların açılmasına qadağa qoymağa, 18 yaşından kiçik məktəblilərin İnternetdən istifadəsinə məhdudiyyətlərin tətbiqinə çağırıb. /ANSPRESS/