Amsterdam "yerin dibinə girir"

İnsanların sayının artması, bununla yanaşı, metropolislərin sürətlə inkişafı və böyüməsi mühəndisləri yeni yollara əl atmağa vadar edir.
 

Bu baxımdan Hollandiyanın “Sturukton” şirkətinin irəli sürdüyü təklif maraq doğurur. Belə ki, tanınmış inşaat şirkətinin planları reallaşsa, Amsterdamın dünyada məşhur olan kanallarının altında yollar, avtomobil dayanacaqları, mağazalar, hətta kinoteatrlar tikiləcək. Plana əsasən, yeraltı Amsterdam 6 və yaxud 7 mərtəbədən ibarət olacaq. Planla bağlı Amsterdam Bələdiyyəsində təqdimat mərasimi keçirən şəhər nəqliyyat departamentinin rəsmisi Tjerd Herrema məsələ barədə ictimaiyyətə açıqlama verib. Onun sözlərinə görə, “Sturukton” firmasının istəyi gerçəkləşsə, əsas yolların, kanalların və evlərin altında idman kompleksləri, kinoteatrlar, böyük firmaların anbarları, həmçinin onların yükləmə və boşaltma yerləri inşa ediləcək: “Yeni plana əsasən, Amsterdamın mərkəzindən keçən kanalların altında yeni çoxmərtəbəli şəhər salınacaq. Yeni Amsterdamın 6 və ya 7 mərtəbədən ibarət olması planlaşdırılır”. Herrema artıq şirkətin plan və layihələri həm çertyoj, həm də animasiya formasında departamentə təqdim etdiyini, ancaq buna təkcə özünün qərar verə bilməyəcəyini və Amsterdam Bələdiyyəsinin dəstəyinin vacib olduğunu söyləyib. O, “Sturukton”un avtoparklarla bağlı layihəsini dəstəklədiyini, lakin digər tikililərin yerin üstündə tikilməsinin daha məqsədəuyğun olduğunu açıqlayıb.
Xatırladaq ki, Amsterdamın bəzi bölgələri dəniz səviyyəsindən 7-8 metr aşağıda yerləşir. Əgər layihə baş tutsa, dəniz səviyyəsindən 50-100 metr aşağıda yeni Amsterdam inşa ediləcək.

Anar Hacı /zaman.az/