Afrika Millətlər Kuboku - çeyrək finalçılar bəlli oldu

Afrika Millətlər Kubokunda pley-off mərhələsində oynayacaq komandalar bəlli olub

Bunlar Misir və Kamerun yığma komandalarıdır

Futbol üzrə Afrika Millətlər Kubokunda pley-off mərhələsində mübarizəni davam etdirəcək növbəti komandalar müəyyənləşib. Bunlar Misir və Kamerun yığma komandalarıdır. 3-cü tur Misir Zambiya millisi ilə top qovub. Nominal meydan sahibi sayılan misirlilər artıq matçın 15-ci dəqiqəsində hesabı açıblar. 1-0. İlk yarıda bu hesabla başa çatıb. Zambiyalılar isə matçın başa çatmasına 2 dəqiqə qalmış rəqibə cavab verə bilib. Kris Katonqa sol cinahda müdafiəçini barmağına doladığdan sonra yaxın küncü dəqiq nişan alıb, 1-1. Matç elə bu hesabla başa çatıb. Misir - Zambiya: 1-1

Adını pley-ofa yazdırmış Kamerun yığması isə Sudan millisi ilə qarşılaşıb. İlk dəqiqələrdən oyuna aktiv başlayan Kamerun millisi yalnız 27-ci dəqiqədə istəyinə çatıb. Samuel Eto penaltidən komandasını hesabda irəli çıxarıb, 1-0. Hücumlarını intensivləşdirən Kamerun yığması bir daha rəqibi matçın 34-cü dəqiqəsində növbəti qolla cəzalandırıb, 2-0. Bu da oyunda vurulmuş son qol olmayıb. Matçın son dəqiqəsində Eto rəqib qapısından bir qol daha keçirib. Yeri gəlmişkən, Afika Mİllətlər Kuboku turnirlərində rəqib torlarını 16 dəfə silkələyən Eto artıq ən məhsuldar futbolçu kimi adını bu turnirin tarixinə yazdırıb. Kamerun - Sudan: 3-0 /ANS PRESS/

Dünən keçirilən matçlardan sonra isə sonuncu çeyrək finalçılar da bəlli olub. Anqola və Tunis də növbəti mərhələyə adlayıb. Bu komandaların dünən öz aralarında keçirilən matç heç-heçə bitib. 0 - 0

Beləliklə, A qrupundan Qana və Qvineya, B qrupundan Fil Diş Sahili və Nigeriya, C qrupundan Misir və Kamerun, D qrupundan Tunis və Anqola növbəti mərhələyə adlayıb.

Çeyrək finalda bu komandalar bir-birilə qarşılaşacaq: Qana və Nigeriya, Fil Dişi Sahili və Qvineya, Misir və Anqola, Tunis və Kamerun