Barmaq damarlarını tanıyan cihaz

Yaponiyanın elektronika üzrə tanınmış şirkəti “Hitachi” barmaq damarlarını tanıyan yeni cihaz icad edib.
 

Avtomobillərin sükanına yerləşdirilməsi üçün nəzərdə tutulan bu aparat sürücünün barmaq damarlarını yaddaşında saxlayır. Beləliklə, başqa şəxs sükan arxasına keçdikdə eyni maşını işə salmaq və ya hərəkətə gətirmək mümkün olmayacaq. Yapon alimlərinin bu yeni ixtirası biometrik texnologiyaya əsaslanır. Bu sistemin gələcəkdə şirkət işçilərinin ofislərə rahat giriş-çıxışını təmin etmək və bank əməliyyatlarının sürətini artırmaq üçün istifadəsi də planlaşdırılır. Yeni icad eyni zamanda sükanın və oturacaqların avtomatik avtomobil sahibinin istəyinə uyğun tənzimlənməsinə imkan verəcək. Sistem vasitəsilə sürücü internetdən alış-veriş edə və yaxud xüsusi koddan istifadə etmədən musiqi yükləyə bilər.
İxtiraçıların fikrincə, vaxt ötdükcə və ya hər hansı bir müdaxilə nəticəsində barmaq damarlarının dəyişməsi qeyri-mümkündür. Şirkət rəhbərliyi əmindir ki, bu texnologiya vasitəsilə maşın oğurluğunun və saxtakarlığın qarşısını böyük ölçüdə almaq mümkün olacaq.

Anar Hacı /zaman.az/