İki dost küsdü, bir dil yox oldu

İki dost küsdü, bir dil yox oldu

İki yaşlı meksikalı dostun mübahisəsi yalnız ikisinin danışdığı bir dilin məhvinə səbəb olub.

Belə ki, Meksikanın cənub-şərqində yerləşən Tabasko əyalətində yaşayan iki ahıl Zoku xalqının dilini bilən son iki nəfər idi. Zokular Meksikanın Çiapas, Oaksaka və Tabasko əyalətlərinə səpələnmiş və sayı xeyli azalmış yerli etnik qrupdur. Meksika Yerli Dillər İnstitutunun rəhbəri Fernando Navanın fikrincə, bu, Meksikada istifadə olunan 364 yerli dilin üz-üzə gəldiyi təhlükəyə faciəvi bir nümunədir. Dünyada indo-amerikan qrupuna məxsus 11 dil ailəsi olduğunu söyləyən Nava bunların hər birinin Meksikada ən azı bir dillə təmsil olunduğunu qeyd edib. Alim hazırda 20-dən artıq dilin tamamilə məhv olmaq təhlükəsi ilə qarşı-qarşıya olduğunu vurğulayıb.
Navanın araşdırmalarına əsasən, belə dillər arasında Aşağı Kaliforniya bölgəsində yayılan Kukapa dili, Sonora bölgəsində yayılan Seri dili, Koahuila əyalətində yayılan Kikapu və Kiapasda istifadə olunan Aquakateko dilləri var. Xatırladaq ki, dünyada danışılan dillərin yarısı Meksika da daxil olmaqla 8 ölkədə cəmləşib. Çoxmillətliliyin müşahidə olunduğu digər 7 ölkənin arasında Braziliya, Hindistan, Papua Yeni Qvineya və Kamerun da yer alır.

Anar Hacı /zaman.az/